Gruppo Culturale Savese

Qualcosa di Sava (TA)

 

UN RICORDO DI FANCIULLEZZA (espresso nel dialetto di Sava)

   A me mama mi ticìa: 'Ssàjiti la pignata ti li fai' e ìu già sapìa tuttu curu ca er'a fari. No tinìa mancu teci anni ma già era responsàbbili cu jutàva mama e fina ca edda si nnitàva li fòji, ca era nnutti sièrma ti fori la sera prima (tutti sangùni, cicòri, lapestri, lattucheddi, mariòli, sprùscini, frizzùli, rùcula, tutti mmischi cussì èrunu cchjiù sapuriti) finattàntu ju pijàva la pignata, mintìa li fai intra e li mmisuràva cu llu tiscitòni: ci èrunu picca mintìa l'otri e ci èrunu moti li lliàva (ca ci noni li fai, quannu stèrunu ntra l'acqua, cunfiàunu e la pignata si cripava).

   Quann' era misu li fai a mmuèddu, pijàva lu quatarièddu e lu mpinnìa alla camastra sott'allu fucalìri e cu la quartaredda l'anchjìa t'acqua ca tirava ti lu puzzu e la bbuccava intr'allu quatarièddu fin'a ddo putìa bastari pi cucinari li fai. Puèi mi pijàva li gliòni ti sott'alla cantina, mi anchjìa lu criscitùru ti lu mièru pi lla sera e puèi, quannu m'era llaàti bbelli bbelli li fòji, ppicciàva lu fuècu sott'allu quatarièddu e mintìa la entri ti la pignata sotta llu funnu ti lu quatarièddu cussì cu llu stessu fuècu si cucinàunu fai e fòji e stera attièntu cu scumava la pignata e cu no si stutàva lu fuècu.

   Quannu s'era sculari la pignata inìa mama cu nno ssia ju non ci la facìa e mi squatàva. Puèi mintìa lu sali nta l'acqua e no mintìa cchjiùi la entri ti la pignata sott'allu quatarièddu ma nnu picca cchjiù luntana, girata totta ti craùni ngiru ngiru. Ntra curu frattièmpu ju mi tirava l'acqua pi llavari li fòji e, quannu l'acqua ti nta lu quatarièddu sta firvìa,  mintìa li fòji, senza sali (ci no si struscìa motu. Ficùriti ca èrunu fattu nnu sunettu: la fòja ti spòja ) quannu li fòji s'èrunu cuètti inìa mama e dicìa: 'Lleti ti qua... ca mo' mi li càcciu ju cu lla cucchiàra furcata... cu nno ssia ima dda nnurari ncunu santu!'.

   E quannu li cacciàva li mintìa nta lu cièstu, ncupirchiàti sott'allu fucalìri cussì si mantinìunu an càutu.

La sera quannu rriàva lu tata mia, fina ca iddu si llavava li mani, ju mintìa la tuàja alla banca, pijàva lu piattu cranni e facìa li feddi. Puèi era còmputu ti sièrma cu ccucchjirisciàva li fai e cu lli ministrava.

                                                                                     Pia SPADA DECATALDO *

* La sig.ra Pia Spada DECATALDO è nata a Sava nel 1929; fornita di viva intelligenza e ottima memoria, ricorda, con ricchezza di particolari, tutti gli aspetti delle tradizioni familiari e locali espressi nel nativo dialetto. 

Postato da: marioannoscia il gennaio 25, 2005 18:52 | link | inserisci i tuoi commenti |